Spanja përjetoi në vitin 2022 vitin më të ngrohtë të regjistruar që nga të paktën 1916, data e të dhënave të para të disponueshme, njoftoi sot shërbimi kombëtar meteorologjik (AEMET).
“2022 ishte viti më i ngrohtë në Spanjë që nga të paktën 1916”, njoftoi agjencia përmes Twitter, duke vënë në dukje se ishte hera e parë që temperatura mesatare vjetore (tejkaloi) 15 gradë Celsius, me pothuajse 15.5°C.
“Deri në vitin 2011, 14.5 gradë Celsius nuk ishte tejkaluar asnjëherë. Që atëherë, kjo ka ndodhur pesë herë”, shtoi AEMET.
Pas vitit 2022, dy vitet më të ngrohta ishin 2017 dhe 2020. Shërbimi Kombëtar i Motit dokumentoi në mënyrë retrospektive temperaturat mesatare vjetore midis 1916 dhe 1961 nga matjet individuale dhe modelet statistikore.
Ashtu si një pjesë e Evropës, Spanja u godit në vitin 2022 nga valët e të nxehtit gjatë verës, e cila u shënua nga zjarre me përmasa të pakrahasueshme, vdekje dhe një nivel i lartë thatësire.
“Për herë të parë, dy sezone radhazi në të njëjtin vit (verë dhe vjeshtë) ishin më të ngrohtat”, kishte nënvizuar AEMET më 21 dhjetor në një raport provizor.
Vdekja e rreth 4744 personave në Spanjë i atribuohet vapës në verën e vitit 2022, sipas vlerësimeve të vdekshmërisë së tepërt të Institutit të Shëndetit Publik.
Më shumë se 3,000,000 hektarë u shndërruan në hi në zjarret e vitit 2022, shifra më e keqe që nga fillimi i regjistrimeve në vitin 2000, sipas Sistemit Evropian të Informacionit për Zjarret në Pyje (EFFIS).
“Duke marrë parasysh reshjet e regjistruara deri më 15 dhjetor, ky është viti i tretë më i thatë i regjistruar”, kishte theksuar AEMET në raportin e saj të ndërmjetëm.
Moti jashtëzakonisht i nxehtë vazhdon edhe në vitin 2023, teksa temperaturat rekord u vendosën në disa qytete në veri të Spanjës në ditën e Vitit të Ri. Në Bilbao, temperatura ishte 25.1°C, temperatura më e lartë e regjistruar ndonjëherë në janar.
/abcnews.al
