Loading ...
Një pikturë e çmuar e piktorit impresionist Pierre-Auguste Renoir, e titulluar “Les Poissons”, është vjedhur nga ambientet e “Fondacionit Magnani-Rocca”, në Mamiano di Traversetolo, në Parma, ditët e fundit.
Lajmi u raportua fillimisht nga “TgR Rai Emilia-Romagna” dhe u konfirmua nga agjencia ANSA.
Bëhet fjalë për një pikturë vaj në telajo, e realizuar rreth vitit 1917, me një vlerë që arrin disa milionë euro.
Vepra konsiderohet ndër të rrallat e Renoir që ruheshin në një koleksion të përhershëm në Itali.
Renoir lindi më 25 shkurt 1841 në Limoges, Francë dhe vdiq më 3 dhjetor 1919 në Cagnes-sur-Mer.
Ai ishte një nga figurat më të rëndësishme të Impresionizmit
Renoir njihet për përdorimin e ngjyrave të ngrohta dhe dritës natyrale
Ai pikturonte shpesh skena të jetës së përditshme, portrete dhe figura njerëzore
Veprat e tij kanë një ndjesi gëzimi, elegancë dhe harmoni
Sipas burimeve, hajdutët kanë hyrë disa ditë më parë në ambientet e Vilës Magnani – e njohur si “Villa dei Capolavori”, që strehon koleksionin e artit të Luigi Magnani – dhe kanë arritur të marrin pikturën pa u zbuluar menjëherë.
Hetimet për ngjarjen janë në zhvillim dhe po drejtohen nga karabinierët italianë, të cilët po punojnë për të identifikuar autorët dhe për të rikuperuar veprën e vjedhur.
“Fondacioni Magnani-Rocca” është një nga institucionet më të rëndësishme artistike në Itali, i cili ruan kryevepra nga autorë si Claude Monet, Paul Cézanne, Tiziano, Peter Paul Rubens dhe Francisco Goya, ndër të tjerë.
