Milimetrat ishin kundër Tottenham, por gjithsesi në fund skuadra e Jose Mourinho e mposhti Brighton me rezultatin e ngushtë 2-1. Kane në fillim u ndal nga VAR, që evidentoi një pozicion jashtë loje milimetrik. Miqtë ia dolën të shënonin të parët, me anë të Webster.
Një goditje dënimi u shfrytëzua prej futbollistit të tyre, i cili me një goditje me kokë e drejtoi topin drejt rrjetës. Festë e Brighton, që në dhomat e zhveshjes u largua duke e pasur rezultatin në favor. Tottenham normalisht nuk mund të pajtohej me diçka të tillë.
Kane, gati 10 minuta pasi nisi fraksioni i dytë i lojës, ia doli të shënonte. Sulmuesi shfrytëzoi një gabim të miqve dhe me dy tentativa të njëpasnjëshme e bëri portierin e Brighton të dorëzohej. Barazim 1-1 dhe tashmë duhej edhe goli i avantazhit.
Një aksion perfekt, kur kishin kaluar 72 minuta lojë, u konkretizua me gol nga Dele Alli. Mesfushori me një gjuajtje nga brenda zonës u tregua i saktë dhe shënoi golin që i dha tre pikët skuadrës së Tottenham, që momentalisht ngjitet në vendin e pestë në klasifikim. /abcnews.al
