Fitorentina i bën “gropën” Napolit në garën për titullin kampion. Skuadra vjollcë mposhti me shifrat 3-2 napolitanët në sfidën e javës së 32-të të Seria A.
Një takim i luftuar për të dyja skuadrat të cilat prodhuan raste pafund për të shënuar në këtë takim, por Fiorentina u tregua më e saktë në finalizim, teksa ndëshkoi plot 3 herë të besuarit e Luciano Spalletit.
Gonzalez në minutën e 39-të i tregoi Napolit se nuk do ta kenë aspak të lehtë në këtë takim për të marrë fitoren, pasi skuadra vjollcë po tenton vendin e 6-të në klasifikim.
Mertens do të barazonte shifrat në pjesën e dytë në minutën e 58-të, ndërsa Ikone do të kthente në epërsi përsëri skuadrën mike në minutën e 66-të.
Cabral do të tunde rrjetën për herë të 3-të në këtë takim për skuadrën e Fiorentinës, ndërsa goli i shënuar nga Osimhen në minutën e 84-të do të shërbente vetëm për statistikë, pasi skuadra mike kishte koleksionuar kështu 3 pikë shumë të rëndësishme. Napoli pas kësaj humbje mbetet në vendin e 3-të me pikë të barabarta me Interin, por ky i fundit ka një ndeshje më pak të zhvilluar.
Atalanta mposhtet në stransfertë nga Sassuolo, pasi vendasit arritën të fitonin me shifrat 2-1. Traore në minutën e 24-të dhe në minutën e 61 do të bënin të pavlefshëm golin e shënuar nga Muriel në fund të takiit.
Pas kësaj humbje “bergamaskët” humbasin terren në garën për një vend në europë, teksa tashmë janë kaluar edhe nga Fiorentinas pas fitores që mori ndaj Napolit, ndërkohë Sassuolo ka grumbulluar 46 pikë në vendin e 9-të.
Fitore mori edhe Udinese përballë Venezias në transfertë, pasi miqtë mposhtën me shifrat 2-1 vendasit.
Doulofeu që në minutën e 35-të do t’i jepte epërsinë skuadrës mike, ndërsa baarzimi do të vinte vetëm në të 86-të nga Henry, por Becao në minutat shtesë të takimit do t’i siguronte 3 pikët skuadrës së tij.
Udinese renditet e 12-ta me vetëm 36 pikë, ndërsa Venezia në vendin e 18-të me 22 pikë, teksa rrezikon edhe rënien në një kategori më poshtë. /f.a/abcnews.al
