Sot bëhen plot 16 ditë nga vendosja e barrikadave në veri të Kosovës, duke vështirësuar në këtë mënyrë jetën e qytetarëve , ndërsa rrugët në drejtim të kufirit të Jarinjës dhe Bërnjakut janë të bllokuara.
Vërehet prezencë e shtuar e pjesëtarëve të KFOR-it, në të dy drejtimet e kufijve me Serbinë. Policia e Kosovës ka shtrirë pikëkontrollet e saj në drejtimin Mitrovicë-Leposaviq me qëllim të pengimit të aktiviteteve kriminale, por duke siguruar kështu edhe lëvizjen e lirë.
Pjesëtarët e Policisë së Kosovës po vazhdojnë patrullimin e tyre edhe nëpër zonat me popullatë të përzier në veri të Mitrovicës, duke ofruar rend dhe siguri për të gjithë qytetarët pa dallim.
Ndryshe, situata e përgjithshme e sigurisë në veri të vendit aktualisht është e qetë.
Ministri i Punëve të Brendshme, Xhelal Sveçla, para tre ditësh ka ritheksuar nga Mitrovica se policia ka kapacitete dhe është e gatshme t’i largojë barrikadat, mirëpo, është në pritje të një përgjigjeje nga KFOR-i, andaj akoma nuk është vendosur për diçka të tillë./abcnews.al/
