Stefano Pioli do të debutojë këtë fundjavë në stolin e Milanit. Kuqezinjtë do të presin Leccen në “San Siro” të dielën në mbrëmje dhe objektivi i vetëm është fitorja.
53-vjeçari ka marrë një vendim në lidhje me ekipin. Lojtarët nuk do të jenë më të detyruar të grumbullohen përpara sfidave. Një zakon i tillë është përdorur nga Giampaolo dhe Gattuso, por nuk do të ndodhë më me Piolin.
Milani do të zhvillojë seancën e fundit stërvitore ditën e shtunë dhe më pas të gjithë do të grumbullohen për darkën e përbashkët. Pioli, i cili nuk i ka preferuar grumbullimet edhe në eksperiencat me ekipet e tjera, ka vendosur të tregohet tolerant dhe lojtarët mund të zgjedhin lirisht të kalojnë natën para ndeshjes me familjet e tyre. /abcnews.al
