Fjala e Zotit iu vjen në ndihmë besimtarëve myslimanë në Tiranë. Kanë mësuar për ndarjen nga jeta të klerikut Fetullah Gylen dhe thonë se nuk duan të merren me politikë.
“Po qe se ka qene i xhenetit zoti ta çojë ne xhenet, Allahu e di. Nuk merrem me politike, unë merrem vetëm me xhaminë, me Zotin.”
Kryejnë ritet e tyre fetare në xhaminë e Namazgjasë në qendër të Tiranës, e cila prej vitesh mbeti peng i përplasjeve mes Komunitetit Mysliman Shqiptar dhe Turqisë financuese që e akuzon për lidhje me klerikun Gylen e kur dalin ja njohin meritat dhe Presidentit turk Erdogan.
“Ne kemi punët tona në Shqipëri. Harmonia e feve është shembull për t’u marrë. Po ta mbajmë këtë kështu jemi me te mirët në botë.”
Të shumtë ishin besimtarët që faljen e drekës e kryen në xhaminë e “Ethem Beut” simbol të kryeqytetit.
Një objekt kulti i rikonstruktuar me fonde të Ankarasë, e cila sa herë i jepet rasti i përsërit Tiranës zyrtare kërkesën për të marrë masa ndaj atyre që i quan struktura të FETO në vendin tonë.
Por për besimtarët këto ndasi nuk kanë rëndësi. Aq më pak kur dikush largohet nga kjo botë.
“Skam koment, është me shume çështje politike se fetare.”
Kleriku mysliman turk, Fetullah Gulen, për të cilin Ankaraja thotë se ishte organizator i grushtit të shtetit të dështuar, të vitit 2016, ka vdekur në Shtetet e Bashkuara të Amerikës.
Lajmi qarkulloi dhe mes besimtarësh ne Tirane, por pa trazuar përditëshmërinë e tyre.
