Ushtria meksikane ka marrë nën kontroll qytetin e lindjes së një bosi të fuqishëm droge në shtetin e Michoacan, në perëndim të Meksikës. Nemesio Oseguera Cervantes i njohur si “El Mencho” ka lindur në qytetin e Naranjo de Chila, Aguililla, dhe kërkohet në Meksikë dhe SHBA. Minat tokësore të vendosura nga bandat rivale në zonën përreth vranë një person dhe plagosën të tjerë javët e fundit.
Mjetet e ushtrisë dhe ekipet e zbulimit të minave po patrullojnë qytetin. “El Mencho”, i cili drejton Kartelin e Gjeneratës së Re Jalisco ka qenë në arrati prej vitesh raporton “BBC”. Banda e tij është një nga kartelet më të fuqishme të drogës në Meksikë dhe besohet se qëndron pas sulmeve ndaj forcave meksikane të sigurisë, siç ishte një pritë e vitit 2015 në Jalisco, e cila la të vdekur 15 oficerë dhe tentativa për vrasjen e shefit të policisë së qytetit të Meksikos në vitin 2020.
Karteli është përhapur nga baza e tij origjinale e pushtetit në shtetin e Jalisco për të pasur një prani pothuajse mbarëkombëtare. Në komunën e Aguililla, Karteli i Gjeneratës së Re Jalisco ka luftuar me rivalin Los Viagras Cartel për kontrollin e zonës prej vitesh. Sipas “Associated Press”, në luftën për kontroll, eksplozivë me dron dhe mina tokësore janë vendosur në të gjithë zonën.
Minat tokësore kanë rezultuar vdekjeprurëse, pasi dy pajisje shpërthyen në javët e fundit. Shpërthimi i parë plagosi një numër ushtarësh dhe i dyti vrau një fermer vendas. Në përgjigje të shpërthimeve, trupat meksikane hynë në zonë, raporton agjencia spanjolle e lajmeve “EFE”. Porti detar i shtetit Michoacan dhe rrugët e kontrabandës nënkuptojnë se ai është një vend i lakmuar për kartelet e drogës.
Bandat rivale të drogës luftojnë për kontrollin e aktiviteteve të paligjshme si prodhimi dhe trafikimi i drogës. Për shkak të dhunës dhe paqëndrueshmërisë në zonë, qindra familje janë larguar me shpresën për të emigruar në SHBA. /abcnews.al
