Të gjithëve na ka ndodhur që të mos flemë mirë sepse kemi ngrënë shumë ose kemi konsumuar ushqime që na shqetësojnë. Përveç ushqimeve që mund të prekin secilin individualisht për shkak të një intolerance, ka edhe ushqime apo pije që duhen shmangur gjatë natës, pasi mund të ndikojnë në cilësinë e gjumit dhe shëndetin tonë të përgjithshëm.
Kafe
Të gjithë e dimë se kafeja “zgjon” trupin, prandaj e konsumojmë kur ngrihemi nga shtrati në mëngjes. Për të mos prishur cilësinë e gjumit, ekspertët thonë se kafeja nuk duhet të pihet më vonë se ora 4-5 e pasdites. Në rast se duam të shijojmë një kafe pasdite-mbrëmje, është më mirë të zgjedhim diçka pa kafeinë.
Çokollata
Mund ta shmangim kafen para gjumit por nuk është burimi i vetëm i kafeinës. Çokollata është mjaft stimuluese: 3 copë çokollatë përmbajnë 23 mg kafeinë, pra ¼ e kafeinës që përmban një filxhan kafeje. Pra, mos u jepni fëmijëve çokollatë gjatë natës. Ata nuk do të flenë lehtë.
Ushqimet pikante
Ushqimet pikante duhet të shmangen para gjumit pasi kanë shumë gjasa të shkaktojnë shqetësime në stomak dhe zorrë dhe të ndikojnë në cilësinë e gjumit tonë.
Ushqimet e skuqura
Ushqimet e skuqura dëmtojnë trupin në shumë mënyra, veçanërisht nëse i konsumojmë gjatë natës. Ushqimet me shumë yndyrë kërkojnë kohë më të gjatë tretjeje. Pra, nëse hamë diçka të skuqur vonë gjatë natës, trupi do të fillojë të përpunojë ushqimin që komplikon sistemin tonë të tretjes, duke prishur kështu procesin e gjumit.
Alkooli
Mund të mendojmë se një gotë verë na vë në gjumë, por në realitet ndikon negativisht në cilësinë e gjumit. Alkooli, veçanërisht në sasi të mëdha, ndikon në mëlçi, e cila përpiqet të eliminojë alkoolin nga trupi ynë. Për shkak se ekziston një lidhje midis mëlçisë dhe zemrës, ndjejmë një rrahje të shpejtë të zemrës, kështu që nuk mund të flemë.
Suplementet dietike me proteina
Nëse jeni duke marrë suplemente dietike për palestër, duhet të jeni shumë të kujdesshëm me udhëzimet e tyre. Ka suplemente për para stërvitjes dhe suplemente për pas. Para se të shkoni në shtrat nuk duhet të merrni asnjëherë suplemente që kanë indikacione për konsum para stërvitjes pasi janë të pasura me kafeinë dhe stimulojnë organizmin. Në të kundërt, suplementet pas stërvitjes mund të merren më lehtë para gjumit. /abcnews.al
