Protestuesit iranianë kanë shprehur “gëzim” për vdekjen e presidentit Ebrahim Raisi, i cili është quajtur edhe si “Kasapi i Teheranit”. Tre iranianë folën për rrëzimin e helikopterit të presidentit në kushte anonimiteti për Sky Neës për shkak të frikës se mund të gjurmoheshin nga regjimi i vendit.
Një udhëheqës proteste, i cili aktualisht është i fshehur, sugjeroi se rrëzimi i helikopterit, ku humbi jetën gjithashtu edhe ministri i Jashtëm i Iranit ishte “i planifikuar paraprakisht”.
“Mund të mos kemi parë gjithçka, por ka qenë një fakt i njohur për një kohë të gjatë që Raisi ishte një pretendent serioz për të zëvendësuar Udhëheqësin Suprem Khamenei, dhe ndoshta disa nuk donin që kjo të ndodhte. Por në përgjithësi, ky ishte një lajm shumë i mirë. Gjithçka që mund të them është se e vetmja gjë që më ka bërë vërtet të lumtur gjatë pesë viteve të fundit ka qenë lajmi për vdekjen e Raisit”, tha ai.
Një student 23-vjeçar, i cili ka marrë pjesë në një sërë protestash, tha: “Vdekja e Raisit e ka lumturuar shumë popullin e Iranit. Në rrugë njerëzit shpërndanin ëmbëlsira, i buzëqeshnin njëri-tjetrit. Kjo është shkalla në të cilën ky lajm ka përhapur gëzim në mesin e njerëzve.”
Një grua, e dhunuar për pjesëmarrje në lëvizjen “Grua, Jetë, Protestë”, tha: “Urrejtja publike ndaj këtij regjimi nuk është sekret për askënd. Vdekja e Raisit dëshmoi se dhimbja që i shkaktoi kjo popullit tonë një ditë do t’i kthejë përsëri. Reagimi im personal për vdekjen e Raisit… Isha shumë e lumtur. Nuk jam fare e mërzitur, edhe pse kurrë nuk i uroj vdekjen askujt, por ky njeri jo vetëm që nuk bëri asgjë për kombin tonë, por urdhëroi vdekjen e të rinjve të panumërt të pafajshëm”.
Ndërsa Raisi ishte në detyrë, vendi u përfshi nga protesta të mëdha për shkak të vdekjes së Mahsa Amini, vajza që vdiq pasi u arrestua për dyshimin se nuk mbante hixhabin e saj siç duhet.
Shtetet e Bashkuara thanë se Raisi kishte “gjak në duart e tij” pasi ish-kleriku i linjës së ashpër ishte “një pjesëmarrës brutal në shtypjen e popullit iranian për gati katër dekada”.
Pas lajmit për vdekjen e Raisit, zëdhënësi i Departamentit të Shtetit të SHBA, Matt Miller tha se presidenti iranian “ishte i përfshirë në abuzime të shumta të tmerrshme të të drejtave të njeriut, duke përfshirë luajtjen e një roli kyç në vrasjen jashtëgjyqësore të mijëra të burgosurve politikë në 1988”./abcnews.al
