Ukraina do të dëmshpërblejë viktimat e abuzimit seksual gjatë luftës, në një lëvizje që zonja e parë e Ukrainës, Olena Zelenska, e quajti “një hap të rëndësishëm drejt rivendosjes së drejtësisë”.
Deri në 500 të mbijetuar ukrainas të dhunës seksuale të lidhur me konfliktin janë identifikuar dhe do të shpërblehen gjatë këtij viti duke përfshirë mbështetjen financiare, mjekësore dhe psikologjike.
“Dëmshpërblimet për viktimat e shkeljeve të rënda të të drejtave të njeriut, përfshirë viktimat e dhunës seksuale të lidhur me konfliktin, nuk kanë të bëjnë vetëm me mbështetjen ekonomike . Është një hap i rëndësishëm drejt rivendosjes së drejtësisë.
“Dhe kjo drejtësi është e nevojshme jo vetëm në Ukrainë,” tha Zelenska.“Drejtësia për viktimat ukrainase të dhunës është tani një pasqyrë për vetë botën”.
Sipas Fondit Global të të mbijetuarve, i cili po administron projektin me Ukrainën duke përdorur fonde nga qeveritë donatore, do të jetë hera e parë që do t’u jepen dëmshpërblime gjatë një konflikti aktiv.
“Rehabilitimi dhe kompensimi është një element i dëmshpërblimeve, por ajo që të mbijetuarit e shohin shumë të rëndësishme është mirënjohja”, tha Esther Dingemans, drejtore e fondit.
Burrat dhe djemtë janë gjithashtu në mesin e viktimave të dyshuara të përdhunimit nga ushtarët rusë në Ukrainë, me dhjetëra raste të dhunës seksuale që po hetohen brenda disa muajsh nga pushtimi.
/abcnews.al
