U shkarkua nga Shoqata e Bashkive, Voltana Ademi nuk njeh vendimin: Eksponentë të PS-së

schedule14:47 - 8 Qershor, 2021

schedule 14:47 - 8 Qershor, 2021

Kryebashkiakja e Shkodrës Voltana Ademi ka reaguar pas vendimit të asamblesë së Shoqatës së Bashkive për të shkarkuar atë nga detyra dhe për të emëruar në postin e drejtuesit Pjerin Ndreun. Ademi shprehet se votimi është bërë nga eksponentë të Partisë Socialiste dhe jo anëtarë Shoqatës së Bashkive të Shqipërisë.

Ajo shprehet se Shoqata konsideron se demokracia lokale dhe sundimi i ligjit kanë një rëndësi madhore për integrimin e vendit duke u zotuar se do të çojnë deri në fund vullnetin për të respektuar ligjin dhe vendimin përfundimtar të Gjykatës Kushtetuese.

“Shqyrtimi dhe vendimi për ligjshmërinë e zgjedhjeve lokale 2019, është një ndër 15 kushtet që Shqipëria duhet të përmbushë për çeljen e negociatave për anëtarësimin në BE, kushte të dakordësuara në takimin e Ministrave për Europën.

Ritheksojmë se Shoqata e Bashkive të Shqipërisë, shoqëria civile në Shqipëri, qytetarët shqiptarë, Shtetet e Bashkuara të Amerikës, Bashkimi Evropian, Këshilli i Evropës, të gjithë partnerët dhe organizatat ndërkombëtare, janë në pritje të vendimit të Gjykatës Kushtetuese.

Në Lezhën e Besëlidhjes, sot eksponentë të Partisë Socialistë tentuan të dëmtojnë Demokracinë. Sot pati një tentativë për të kapur ilegalisht Shoqatën e Bashkive të Shqipërisë, veprime te ndërmarra nga eksponentë, anëtarë të Partisë Socialiste, pa të drejta legjitime dhe jo anëtarë Shoqatës së Bashkive të Shqipërisë. Çdo veprim me prapavijë politike dhe arbitrare cënon hapur parimet e shtetit ligjor dhe demokracisë vendore.

Shoqata e Bashkive të Shqipërisë konsideron se demokracia lokale dhe sundimi i ligjit kanë rëndësi madhore për integrimin e vendit tonë. Shoqata e Bashkive të Shqipërisë është e vendosur për të vijuar deri në fund duke shprehur vullnetin e saj për të respektuar ligjin dhe vendimin përfundimtar të Gjykatës Kushtetuese”, shkruan Voltana Ademi. m.v/abcnews.al