Kryebashkiaku i Vlorës Dritan Leli ka përgënjeshtruar lajmet që kanë qarkulluar në media se është shfaqur duke biseduar me kunatin e kryedemokratit Lulzim Basha. Leli shprehet se personi me të cilin ai shfaqet në video është inxhinier dhe pedagog duke theksuar se kunatin e Bashës nuk e njeh dhe nuk e ka takuar asnjëherë në jetë.
“Për të gjithë ata që nxjerrin çfarë duan e nuk shohin çfarë nxjerrin, me gjithë skenarët e qëndisur, më duhet të them se në videon e publikuar nga media, ndërkohë që është duke u zhvilluar Asambleja Kombëtare e Partisë Socialiste, jam duke biseduar me inxhinierin e pedagogun vlonjat Idlir Dervishi, në oborrin e Akademisë së Arteve, pranë Universitetit Politeknik, ku Idliri punon!
Kunatin e Lulit, as nuk e kam parë, as nuk e kam takuar ndonjëherë në jetë”, shkruan Leli.
Ky është reagimi i parë i Dritan Lelit që pas përjashtimit nga partia. Ai pati një krisje me kryesocialistin Edi Rama pasi nuk pranoi të hiqte dorë nga posti i kryetarit të Bashkisë për të kandiduar për deputet.
Sot anëtarët e këshillit të bashkisë Vlorë kërkuan mbledhje jashtë radhe të këshillit të bashkisë për ballafaqim me kryetarin e bashkisë Dritan Leli ndërsa kërkohet edhe prezenca e kryeministrit Edi Rama. /mv.abcnews.al
