Një shtetas turk i shpallur në kërkim nga policia turke është futur në Sarandë në datën 20 gusht. ABC mëson se ai ka udhëtuar drejt Sarandës me tragetin e linjës që vinte nga Korfuzi.
38-vjeçari me banim në Stamboll, ka dorëzuar pasaportën në sportel, dhe pas verifikimeve ka rezultuar se ai ishte i shpallur në kërkim në shtetin turk nga Interpol Ankara.
Ai i tha autoriteteve se e kishte humbur pasaportën dhe më pas e ka rigjetur sërish. Policia ka nisur hetimet, pasi në të dhënat e Interpol Ankara thuhej se pasaporta nuk ishte lëshuar për këtë person por për një tjetër, që e kishte deklaruar atë të humbur, ndërsa vetë 38-vjeçari ishte shpallur në kërkim kombëtar në Turqi.
Policia arrestoi të dyshuarin për falsifikim të mjetit të identifikimit. Katër ditë më vonë Gjykata e Sarandës ka vendosur masë e sigurisë “Detyrim Paraqitje”, kundrejt garancisë pasurore me vlerë 1 mln lekë të reja.
Turkut i është lënë afat deri në datë 29 gusht për të paguar garancinë dhe deri në atë moment do të vijojë të qëndrojë në qeli. m.v/abcnews.al
