Eksperti për çështjet e turizmit, Besni Vathi thotë se dhe viti 2024 do të jetë i suksesshëm për Shqipërinë.
Në emisionin “Sheshi i Dollarit” në ABC News, Vathi u shpreh se do të ketë rritje të numrit të turistëve.
“Duhet të kemi konceptin e qartë se ku duhet të arrjimë. Koncepti im, është nëse ndërtohen struktura pritëse, jo hotele. Lidhur me turizmin elitar, nuk ka vetëm dy lloje turizmi, ku është turizmi i mesëm? Nuk mund të shkojmë nga më i ulëti te elitari. Lidhur me pritshmëritë për vitin 2024, edhe viti që vjen mendoj se do të jetë i suksesshëm, ndoshta me shifra shumë me të larta, mund të shkojë edhe 11 milionë apo 11.5 milionë në raport me hyrjet totale”, theksoi Vathi.
Ndërkaq, ekspertja për turizmin e qëndrueshëm, Eva Kushova deklaroi se ka ndryshuar imazhi i Shqipërisë.
“Nëse flasim për turizëm të qëndrueshëm, duhet të jemi të distancuar nga plazhi. Në shumë vende të botës, ka ligje, se sa nga bregu duhet të ndërtosh. Duhet të jenë në distancë, plazhet duhet të jenë të lira. Turizmi i qëndrueshëm është edhe ky, duhet t’’ia lësh natyrës habitatin. Mendoj se do të vazhdojë kjo rritje, por uroj të mos na kthehet në boomerang ky numër turistësh. Shqipëria ka ndryshuar imazhin. Për turizmin e qëndrueshëm, unë them që jemi shumë mbrapa rajonit”, tha ajo./abcnews.al
