Eksperti i punësimit, Erion Muça thotë se mungesa e punonjësve në sektorë si turizmi dhe bujqësia është kthyer në një problem serioz.
Në një intervistë për ‘Shqipëria Sot” në ABC News, Muça u shpreh se edhe pse janë rritur pagat në vend, njerëzit sërish largohen.
Sipas Muçës, duhet punuar në mënyrë që të promovohet rritja e pagës.
“Ka një tregues dhe një të dhënë se mungesat në bujqësi janë reale. Bujqësia është një nga sektorët me informalitetin më të lartë, akoma shumë sipërmarrje në sektorin e bujqësisë nuk janë formalizuar aq sa duhet. Më pas, konkurrenca agresive nga vendet e rajonit, i josh dhe tërheq punonjësit duke i ofruar pagë më të lartë se Shqipëria, duke i mundësuar edhe lehtësimin, akomodimin dhe ushqimin, i bëjnë këto paketa më atraktive për këta punonjës. Një tjetër element se pse bujqësia vuan, është edhe trajtimi jo dinjitoz i punëtorëve. Ne tani kemi ndezur sirenën e alarmit, që shumica e punonjësve kanë ikur jashtë.
Duhet stabiliteti dhe promovimi. Duhet që e gjithë kjo rritje e pagës, të promovohet për punonjësit që punojnë jashtë vendit. Duhet të promovohet rritja e pagave, t’i ofrohet një farë sigurie. Ne nuk e shohim si shqetësim prioritet këtë. Kjo është çështje se si përcakton strategjinë kombëtare. Ne nuk kemi marketing agresiv, por edhe këtu nuk i kemi hapat e sinkronizuar”, theksoi ai./abcnews.al
