Sipas BBC, kreu i shtëpisë së bardhë ka gati një plan sipas të cilit në Shtetet e Bashkuara të Amerikës do të hyjnë vetëm emigrantët që e meritojnë dhe që kalojnë me sukses një test me shkrim për gjuhën angleze.
Presidenti i shteteve të bashkuara të amerikës Donald Trump ka tashmë gati propozimin e tij të ri për emigracionin. Propozim i cili bazohet mbi meritat dhe që mendohet të favorizojë punëtorët me një bagazh studimesh dhe një njohje të mirë të gjuhës angleze.
Lajmi është raportuar nga BBC. Duke folur në Shtëpinë e Bardhë, Trump pohoi se planin e tij të ri do ta ketë zili e gjithë bota moderne.
Trump shpjegoi se plani i tij do të lejojë që të ketë një numër më të madh emigrantësh të cilët do të jenë më të aftë dhe do të kenë më shumë merita.
Kreu i shtëpisë së bardhë theksoi se emigrantët duhet të mësojnë anglisht dhe të kalojnë me sukses një test me shkrim para se të pranohen në vend. Sipas presidentit amerikan Shtetet e Bashkuara të Amerikës kanë një histori krenare për mbrojtjen e atyre që arratisen nga persekutimet.
“Aktualisht, fatkeqësisht azilkërkuesit e ligjshëm janë lënë mënjanë nga ata që bëjnë kërkesa të paqëna”, theksoi Trump./ABC News Albania 24/7
