Loading ...
Presidenti amerikan Donald Trump deklaron se ka siguruar më shumë se 1 miliard dollarë të ardhura gjatë vitit 2025, kryesisht nga investimet në kriptovaluta, sipas deklaratës së tij të detyrueshme financiare.
Në dokumentin prej 927 faqesh, Trump raporton 635 milionë dollarë të ardhura nga monedha meme me emrin e tij, si dhe mbi 500 milionë dollarë nga World Liberty Financial, një kompani kriptovalutash e themeluar nga djemtë e tij dhe familjarë të të dërguarit të posaçëm Steve Witkoff. Përveç kësaj, ai ka përfituar dhjetëra miliona dollarë nga bizneset e pasurive të paluajtshme, klubet e golfit dhe produktet me markën Trump.
Shtëpia e Bardhë mohon se presidenti po përfiton nga posti i tij, duke theksuar se bizneset administrohen nga një trust i menaxhuar nga djemtë e Trump. Zëvendëssekretarja e shtypit, Anna Kelly, deklaroi se as presidenti dhe as familja e tij nuk janë të përfshirë në konflikt interesi dhe se çdo vendim i administratës merret në interes të qytetarëve amerikanë.
Megjithatë, ekspertë të etikës kanë ngritur shqetësime. Ish-këshilltari për etikën në Shtëpinë e Bardhë gjatë administratës së George W. Bush, Richard Painter, e cilësoi situatën si një konflikt të qartë interesi, ndërsa analistë të tjerë vlerësojnë se Trump ka ndjekur një qasje krejt ndryshe nga presidentët e mëparshëm në raport me bizneset e tij private.
Deklarata financiare tregon gjithashtu se Trump përfitoi rreth 77 milionë dollarë nga resorti Mar-a-Lago, 122 milionë dollarë nga klubi i golfit në Doral të Floridës, si dhe dhjetëra milionë të tjera nga klubet e tij në New Jersey, Florida dhe Skoci. Ai ka përfituar gjithashtu miliona dollarë nga shitja e orëve, Biblave, atleteve, parfumeve dhe produkteve të tjera me markën Trump.
Edhe Zonja e Parë, Melania Trump, deklaroi mbi 16 milionë dollarë të ardhura, kryesisht nga një marrëveshje licence për dokumentarin kushtuar jetës së saj dhe nga shitja e NFT-ve.
Në deklaratë përfshihen edhe rreth 86.5 milionë dollarë të ardhura nga marrëveshje gjyqësore me kompani si ABC, CBS, Meta, YouTube dhe X. Sipas Shtëpisë së Bardhë, pjesa më e madhe e këtyre fondeve do të përdoret për bibliotekën presidenciale të Trump dhe për projekte jofitimprurëse.
