Agjencia Evropiane e Barnave (EMA) deklaroi sot se kishte gjetur një “lidhje të mundshme” por shumë të rrallë mes vaksinës kundër COVID-19, Johnson & Johnson dhe rasteve të mpiksjes së gjakut apo trombozës, por shtoi se janë “shumë të rralla” dhe se “përfitimet i tejkalojnë rreziqet”.
EMA arriti në përfundimin se këto raste duhet të kategorizohen si efekte anësore jashtëzakonisht të rralla të vaksinës. Agjencia tha në një deklaratë se kishte marrë në konsideratë të gjitha të dhënat në dispozicion, përfshirë tetë raste serioze të trombozës në Shtetet e Bashkuara nga më shumë se 7 milionë të vaksinuar.
Të gjitha rastet kanë ndodhur te persona nën moshën 60 vjeç, kryesisht gra, brenda tre javësh nga vaksinimi. Të dhënat e disponueshme nuk lejojnë që EMA të flasë për faktorë specifik të rrezikut. Rastet e pazakonta raportohet të jenë të ngjashme me ato të regjistruara në një numër të vogël njerëzish të vaksinuar me vaksinën AstraZeneca.
Sipas një sondazhi në Shtetet e Bashkuara, vendimi i autoriteteve për të pezulluar administrimin e vaksinës Johnson & Johnson kishte një efekt negativ në besimin e publikut: përqindja e amerikanëve që e konsiderojnë vaksinën të sigurt ra me 15 pikë.
Pak ditë më parë SHBA, Afrika e Jugut dhe Bashkimi Europian ndaluan përkohësisht shpërndarjen e vaksinës Johnson & Johnson pas raporteve të mpiksjes së gjakut./ db/ Abcnews.al
