Presidenti i Republikës Ilir Meta ka reaguar pasi prokurorit Arian Muça ju vendos lëndë shpërthyese në automjetin e tij të parkuar. Në një postim në Facebook, Meta shkruan se e dënon aktin ndërsa kërkon që ngjarja të zbardhet sa më shpejt dhe të identifikohen autorët.
Çdo sulm apo intimidim ndaj funksionarëve të Drejtësisë, sipas asaj që shprehet kreu i shtetit, duhet të marrë ndëshkimin më të ashpër ligjor.
POSTIMI
“Dënoj me forcë aktin kriminal ndaj funksionarit të sistemit të drejtësisë, Prokurorit Arjan Muça.
Duke mbështetur plotësisht vendimmarrjen e Këshillit të Lartë të Prokurorisë për sigurinë e tij, u kërkoj institucioneve të ngarkuara nga ligji të garantojnë mbrojtjen e posaçme për Prokurorin Muça dhe familjen e tij. Organi i akuzës dhe të gjithë agjencitë ligjzbatuese e të sigurisë duhet të angazhohen maksimalisht për të zbardhur sa më parë ngjarjen dhe identifikuar autorët. Çdo sulm apo intimidim ndaj funksionarëve të Drejtësisë duhet të marrë ndëshkimin më të ashpër ligjor.” sb/abcnews.al/
