Interi zhvillonte një super sezon 10 vite më parë dhe në fund fitoi tripletën e famshme. Esteban Cambiasso ishte një një ndër lojtarët më të zgjuar të makinerisë së frikshme që kishte krijuar Jose Mourinho. Cuchu rikthehet pas në kohë, tregon sekretet dhe forcën e asaj skuadre në një prononcim për Sky Sport, dhe e mbyll me elozhet për “Special One”, trajnerin, shpirtin dhe liderin e ekipit.
“Çdo lojtar e kishte të qartë detyrën e tij në atë skuadër. Nuk duhet harruar kurrë vetë-motivimi ynë. Hodhëm shumë hapa për të arritur tek ai sukses. Ishim të vetëdijshmë që ishim gati për betejë. Nëse ke edhe një sulmues që zgjohet dhe shënon dy gola në finalen e Champions League… Sulmuesi perfekt zotëron inteligjencë, është altruist dhe di të dërgojë topin në rrjetë, me pak fjalë ai është Milito.
Sekreti jonë nuk ishte vetëm forca. Duhet që një skuadër të jetë si një kameleon. Ka momente kur ai Inter mbahet mend si një skuadër që mbrohej mirë, por ishim në gjendje të fitonim edhe me më shumë se një gol diferencë si ndaj Barcelonës ose në derbin me Milanin. Dinim të mbronim dhe të sulmonim. Ishim të aftë në mbrojtje edhe falë Eto’o, Sneijder dhe Militos.
Mourinho? Është e vështirë të zgjedhësh cilësinë e tij më të mirë, por mund të them mënyra e stërvitjes. Stërviteshim shumë me topin, e bënim me një intensitet të madh. Thuhet se Jose është shumë i aftë në komunikim, por është më shumë se aq. Ai është një trajner i përgatitur në shumë nivele”, deklaron ish-mesfushori argjentinas i skuadrës italiane. /abcnews.al
