Familjet e dy minatorëve Fatos Çeskut dhe Rruzhdi Rushitit, që humbën jetën në minierën e Balgjajt në Peshkopi kanë përcjellë për në banesën e fundit të afërmit e tyre. ABC News ka udhëtuar drejt Bulqizës për të zbardhur detaje rreth ngjarjes së rëndë, ku dy minatorët bashkë me pronarin e minierës ku ata punonin, Ismail Hoxha u nxorën të pajetë.
Gazetari Xhevahir Zhabina ka mundur të mësojë se policia nuk e ka referuar ende dosjen e plotë në Prokurorinë Dibrës. Kjo pasi punëdhënësi i tyre ka vdekur bashkë me ta në minierë dhe nuk mund të ngrihet akuza “Shkelja e rregullave të mbrojtjes në punë”. Autoritetet do të vendosin në orët në vijim akuzën që do të ngrihet për këtë tragjedi dhe ditën e nesërme pritet të nisë edhe një hetim.
Në zonën e Selishtës aktualisht janë 10 galeri, 2 prej të cilëve janë aktive në QKR, ndërkohë që ekziston frika se punohet edhe në të tjerat duke shkelur rregullat dhe sigurinë pë punonjësit.
Gjendja për dy familjet e minatorëve që lanë pas respektivisht nga dy dhe tre fëmijë secili, paraqitet e rëndë pasi ata ishin i vetmi krah pune në familje./mv.abcnews.al
