Loading ...
Pritej një fitore e madhe, sidomos pas daljes me kartonin e kuq, të qendërmbrojtësit, Paulo Junior, në minutën e 19’-të, mirëpo në “Elbasan Arena”, “Bardheblutë” e Tiranës nuk kanë shkuar më shumë se barazimi 1 me 1, në përballjen e javës së 25-të të kampionatit shqiptar të futbollit, Abissnet Superiore, ndaj “Bardhezinjve” të Laçit.
Të parët, që gjetën rrugën e rrjetës ishin pikërisht kryeqytetasit e Erbim Fagut, me “fantazistin” e mesfushës, Regi Lushkja, i cili përifton nga një “përgjumje” e mbrojtjes “kurbinase” për ta dërguar topin në rrjetën e portierit Dajsinani, në minutën e 54’-t, mirëpo sfida nuk mbaroi me kaq dhe në minutën e 78’-të të saj, talenti 18-vjeçar i mesfushës, Olsi Myrta barazon gjithçka me këtë të fundit, që gjeti golin e 4-t sezonal me fanellën e “Bardhezinjve”.
Megjithatë, pavarësisht se siguroi 1 pikë, aq mjaftoi, që Tirana të rikthehej në zonën e “Final Four”, kjo prej humbjes së Dinamo City, ndaj Vllaznisë, teksa të dy ekipet kryeqytetase janë në kuotën e 35 pikëve, mirëpo në përballjet direkte fitues janë “Bardheblutë”. Në krahun tjetër, “Bardhezinjtë” e Laçit ngjiten në kuotën e 30 pikëve dhe janë 5 pikë larg më të mirëve. /i.m /abcnews.al
