Tre-mujori i parë i këtij viti nis me një rritje të jashtëzakonshme në numrin e udhëtarëve për Aeroportin Ndërkombëtar të Tiranës, krahasuar me vitin e kaluar.
Vetëm në tre muajt e parë të vitit 2024 TIA raporton 63.9% më shumë udhëtarë sesa e njëjta periudhë, vitin e kaluar. Plot 1,910,616 pasagjerë kanë hyrë dhe dalë nga kjo portë që tashmë është kryesore për Shqipërinë, krahasuar me 1,166,000 pasagjerë, për tre-mujorin e parë të vitit 2023.
Vlen të theksohet që viti 2023 ishte gjithashtu një vit rekordi në shifra udhëtarësh ku deri në fund të muajit dhjetor u numëruar mbi 7.2 milion pasagjerë. Kjo ka qene shifra më e lartë e regjistruar ndonjëherë për Aeroportin Ndërkombëtar të Tiranës, e cila ishte edhe pika më e madhe e fluksit të turizmit në vend ku në total, në të gjithe Shqipërinë u regjistruan 10 milion udhëtarë.
Me marrëveshjet e reja për linjat low cost si edhe me shtimin e madh të linjave të reja me destinacione direkte, TIA vijon të ketë rritje të pakrahasueshme udhëtarësh dhe kjo është mëse e dukshme edhe nga shifrat e këtij viti. Drejtuesit e aeroportit kanë parashikuar që për vitin 2024 të mirëpresin mbi 9 milion pasagjerë, por me trendin e deritanishëm, ky target duket se do të tejkalohet. Muajt me fluksin më të madh pritet të jenë muajt maj – tetor, periudhë kur janë shtuar edhe shume destinacione direkte, sezonale, për të rritur sa më shumë mundësitë për pushimet verore. Për të përballuar këtë fluks, TIA ka zgjeruar terminalin si edhe është duke punësuar staf sezonal që t’i përgjigjet me shërbim udhëtarëve të shumtë.
Së fundmi Iberia, ka nisur lidhjen direkte me Madridin. Që prej muajit qershor, Tirana do të lidhet direkt me Kuwait, përmes Jazeera Airways. Me Croatia Airlines, nisin fluturimet direkte drejt Zagrebit, nga 20 qershori. Air Baltic shton qytetin e Rigës si destinacion në periudhën maj – tetor. WizzAir shton Valencian dhe Leipzig në listën e destinacioneve të këtij viti. Sun Express do të ketë linjë direkte me Izmirin për sezonin qershor – tetor. LOT Polish Airline dyfishon prezencën drejt Varshavës, duke shtuar operimet edhe me aeroportin e ri të Radom, prej qershorit. Transavia ka nisur lidhjen direkte me Amsterdamin si edhe do të fillojë fluturimet drejt Lyon, prej muajit prill. RyanAir do të shtojë Marsejën, Kalabrinë, Brimingamin dhe Bristolin, nga Tirana. Aegean do të lidhë Tiranën me ishullin e Rhodos dhe Heraklion (Kretë) përgjatë muajve qershor – tetor. Norwegian çel destinacionet drejt Kopenhagen dhe Oslo, gjatë muajve maj – tetor. Antalia do të jetë e aksesueshme nga Tirana që prej qershorit, me Pegasus. Po nga muaji qershor, nisin fluturimet direkte shtetin ende të paeksploruar të Omanit, me Salam Air. Ndërsa Stutgarti lidhet me Tiranën, me Eurowings, duke nisur nga marsi e në vazhdim.
Planet strategjike të Kastrati Albania, zotëruesi i 100% të aksioneve të Aeroportit Ndërkombëtar të Tiranës, nuk ndalen me kaq. TIA vijon punën intensive për t’u zgjeruar edhe më tej me një terminal edhe më të madh. Ndërsa, përsa i përket planeve të linjave ajrore, synon të lidhë Tiranën drejtëpërdrejtë me kontinentin e Amerikës, brenda vitit 2025. Për realizimin e kësaj rritjeje ambicioze, puna ka nisur si për terminalin e ri ashtu edhe për shtimin dhe rinovimin e pistës, që do të presë avionët ndër-kontinentalë.
