Policia italiane ka shkatërruar një bandë të trafikut të lëndëve narkotike dhe ka vënë në pranga 19 persona, mes të cilëve edhe shqiptarë.
Në kuadër të operacionit të koduar “SAUDADE-bis”, Guardia di Finanza e Milanos ka bërë të mundur identifikimin dhe kapjen e personave të përfshirë në këtë trafik narkotikësh.
Mediat bëjnë me dije së të arrestuarit akuzohen për trafik ndërkombëtar droge mes Shqipërisë dhe Amerikës Jugore e Italisë. Grupi kriminal trafikonte kryesisht marijuanë, hashash e kokainë përmes rrugës së Adriatikut dhe përmes rrugëve ajrore.
Hetimet e operacionit kanë nisur në vitin 2016 nga Guardia di Finanza e Milanos e cila ka sekuestruar rreth 2 tonë drogë me vlerë 5 milionë euro.
Gjatë operacionit të sotëm policia italiane ka kryer disa kontrolle banesash dhe lokalesh ndërkohë që hetimet kanë zbardhur të gjithë degët e veprimit të grupit Kriminal. Personat e vënë nën masa ndalimi akuzohen për trafik ndërkombëtar droge e pjesëmarrje në aktivitet kriminal./abcnews.al
