Loading ...
Tirana shpëtoi pozitat e trajnerit Ze Maria, duke marrë një fitore të vështirë në fushën e Kastriotit. Kryeqytetasit ia dolën 3-2 dhe lanë pas humbjen e derbit.
Pengesa ishte e kalueshme dhe u kalua.
Tirana mori fitoren në Fushë-Krujë ndaj Kastriotit, që quhej vendas, duke forcuar disi pozitat e saj në renditje, por edhe pozitat e trajnerit Ze Maria.
Braziliani vërtet iu shmang shkarkimit pas humbjes së derbit, por një tjetër disfatë apo edhe barazim mund të kishin rezultuar fatale për të.
Bardheblutë, gjithsesi, nuk e patën të lehtë si Skënderbeu disa javë më herët, por u desh të vuajnë deri në fund.
Ishin, madje, në dizavantazh kur Bardhi shënoi në portën pa portier pas daljes së Ilion Likës.
I papritur ndoshta reagimi i kryeqytetasve të cilët përmbysën shifrat në vetëm 7 minuta.
Problemi i realizimit, më i vështiri për ekipin e Ze Marisë, këtë herë nuk u bë pengesë.
Thënë kjo, Tirana nuk ishte plotësisht bindëse, duke pësuar dy gola, e duke u rrezikuar deri në fund për t’i ikur fitorja nga duart.
Miqtë patën edhe ankesa ndaj gjykimit, pasi pretenduarn për një penallti me anë të Blazhevskit, ndërsa kërkuan që goli i dytë i krutanëve të mos quhej i tillë pasi, sipas tyre, topi nuk e kishte kaluar vijën fatale.
Me këtë sukses, tiranasit u ngjitën në kuotën e 8 pikëve, sërish poshtë në renditje, në vend të shtatë.
Kastrioti zbriti në vend të fundit dhe trajneri Plori deklaroi se do t’i kërkojë dorëheqjen krerëve të klubit.
Në ndeshjet e tjera, Laçi mundi 1-0 Flamurtarin dhe vazhdoi ngjitjen, ndërsa Luftëtari ndërroi vendet në klasifikim me Kamzën, duke e mposhtur 1-0 në Gjirokastër./abcnews.al
