Loading ...
Rreth 2,000 persona, përfshirë anëtarë të forcave të sigurisë, kanë humbur jetën gjatë protestave në Iran, ka deklaruar një zyrtar iranian. Kjo është hera e parë që autoritetet pranojnë një bilanc kaq të lartë viktimash nga shtypja e protestave që kanë përfshirë vendin prej dy javësh.
Sipas zyrtarit, i cili foli në kushte anonimiteti, përgjegjës për vdekjet janë persona të cilët ai i cilësoi si “terroristë”, pa dhënë detaje mbi ndarjen mes viktimave civile dhe forcave të sigurisë.
Protestat shpërthyen për shkak të kushteve të rënda ekonomike dhe përbëjnë sfidën më serioze për udhëheqjen iraniane në vitet e fundit. Situata është përkeqësuar edhe më tej nga presioni ndërkombëtar, pas vendimit të presidentit amerikan Donald Trump për vendosjen e tarifave 25% ndaj importeve nga çdo vend që bashkëpunon tregtarisht me Iranin.
Trump ka paralajmëruar gjithashtu se veprimet ushtarake mbeten një opsion i mundshëm në përgjigje të dhunës ndaj protestuesve.
Në Evropë, kancelari gjerman Friedrich Merz deklaroi se beson se regjimi iranian ndodhet në fazat e fundit të ekzistencës së tij, një deklaratë e cila u kundërshtua ashpër nga ministri i Jashtëm iranian Abbas Araqchi.
Ndërsa protestat vazhdojnë dhe ekonomia përkeqësohet, analistët paralajmërojnë se Irani po përballet me një nga momentet më të brishta politike të dekadave të fundit. / abcnews.al /
