Presidenti i Kosovës, Hashim Thaçi, është takuar në Shkup me kryeministrin e Maqedonisë, Zoran Zaev. Kreu i shtetit kosovar u bëri apel maqedonasve që në 30 Shtator të dalin të votojnë për të ardhmen e tyre.
Kryeministri i Maqedonisë, Zoran Zaev, ka pritur në Shkup presidentin e Kosovës, Hashim Thaçi. Pas bisedës, ata kanë dalë në konferencë të përbashkët për shtyp. Kreu i ekzekutivit maqedonas theksoi rëndësinë e dialogut mes Prishtinës dhe Beogradit
Zoran Zaev: “Maqedonia përshëndet dialogun mes Kosovës dhe Serbisë. Maqedonia mbështet zgjidhjen që do të përforcojë paqen dhe stabilitetin në rajon. Është e rëndësishme që liderët e rajonit të bashkohen në rrugën drejt integrimit euro-atlantik”.
Nga ana e tij, presidenti i Kosovës Hashim Thaçi, vlerësoi nivelin e bashkëpunimit mes dy vendeve, duke theksuar edhe ndërtimin e autostradës e cila do të mundësojë qarkullimin e njerëzve dhe mallrave dhe do të ndikojë në rritjen e bashkëpunimit ekonomik.
Hashim Thaçi: “Kosova dhe Maqedonia nuk kanë asnjë çështje të hapur, janë dy shtete mike me një bashkëpunim të shkëlqyer”.
Por Thaçi është ndalur dhe tek vizita e presidentit serb në Kosovë.
Hashim Thaçi: “Vizita e Vuçiç është bërë me lejen e autoriteteve kosovare. Deklaratat e tij në Kosovë ishin emocionale dhe nuk i shërbejnë dialogut Kosovë-Serbi”.
Në fund të fjalës së tij, Thaçi ftoi qytetarët e Maqedonisë që të votojnë “pro”referendumit sepse sipas tij, Maqedonia në NATO nënkupton stabilitet për të gjithë rajonin./abcnews.al
