Loading ...
E vjetra ia ka lënë përfundimisht vendin të resë. Në tenis është mbyllur një epokë e madhe dhe është hapur një tjetër periudhë tashmë me dy yje, jo me tre.
Gjigandët Federer-Nadal-Gjokoviç ia kanë lënë skenën spanjollit Karlos Alkaraz dhe Janik Siner, që këtë të diel do të luajnë për titullin në Grand Slemin US Open.
Në Nju Jork u luajt një nga dramat e fundit të legjendës, Novak Gjokoviç, i mundur 3-0 me sete nga Alkaraz, edhe pse dy të parët ishin shumë të fortë.
Për tenistin serb “dielli” po perëndon gjithnjë e më shumë, siç e tregojnë rezultatet këtë vit.
Në gjysmëfinalen e Uimbëlldonit, Nolen e mundi bindshëm Janik Sineri, ndërsa e njëjta gjë ndodhi në katërshe në Rolan Garos.
Suksesi I tij I fundit I madh mbi “mbretërit” e rinj të tenisit u arrit në çerekfinalen e Australian Openit në janar kur mundi 3-1 pikërisht Alkarazin, por pastaj u tërhoq I dëmtuar nga gjysmëfinalja ndaj gjermanit Zverev.
Sa më shumë kalojnë muajt, aq më shumë bie rekordmeni I Grand Slemeve, dhe aq më të fortë bëhen dominuesit e Epokës së Re.
Gjokoviç ka krenarinë se është i vetmi tenist në historinë e këtij sporti që ka arritur dhe ka humbur në gjysmëfinale në të katër Çmimet e Mëdha të një viti, siç ndodhi në 2025.
Nole e pranoi se do të jetë shumë e vështirë për të që të kalojë pengesën Siner-Alkaraz, por deklaroi se synon të vazhdojë edhe vitin e ardhshëm.
Pra, për momentin, nuk ka pension.
Gjithsesi, tashmë flitet për Karlos Alkarazin, që ia doli pas dy orësh e 25 minutash lojë.
Spanjolli do të luajë finalen ndaj rivalit të tij të vetëm, Janik Siner.
Italiani, kampion në fuqi në US Open, kaloi rivalin kanadez, Ozhe-Aliasimë, por duke e humbur një set.
Rezultati ishte 6-1, 3-6, 6-3 e 6-4, por numrit 1 të botës iu deshën plot 3 orë e 21 minuta, ndërsa për finalen do të ketë diçka më pak kohë për të pushuar sesa spanjolli.
Për më tepër, Siner pati nevojë për ndërhyrjen e mjekëve në përfundim të setit të dytë, por deklaroi pas ndeshjes se nuk ka asgjë për t’u shqetësuar.
Italiani ka arritur finalen në të katër Grand Slemet e vitit, diçka që më parë e kanë bërë vetëm Rod Lejvër, Rozher Federer dhe Novak Gjokoviç.
