Loading ...Efektet e konfliktit ku është përfshirë Lindja e Mesme kanë nisur të ndjehen edhe në Shqipëri. Në disa pika karburantesh në kryeqytet ka pasur shtrenjtim të naftës ndërsa çmimi ka arritur në 179 lekë litri, nga 173-175 lekë/ litri që ka qenë më parë.
Por për të shmangur abuzimet ka nisur monitorimi i tregut të karburanteve me pakicë.
Autoriteti i Konkurrencës thekson se nuk do të tolerojë luhatje të pajustifikuara të çmimeve ose në të kundërt kompanitë do të penalizohen.
Po ashtu sipas Autoritetit po monitorohen edhe praktikat e palejuara të koordinimit të çmimeve mes operatorëve të tregut që bien ndesh me logjikën e tregut.
Në njoftim thuhet se Çdo devijim i pajustifikuar, qoftë edhe rritje më e shpejtë apo më e theksuar se ecuria e çmimeve ndërkombëtare, përbën tregues të mundshëm të sjelljeve jo konkurruese në treg.
Të gjitha ndërmarrjet që ushtrojnë veprimtarinë e tregtimit të karburanteve në vend janë vendosur aktualisht nën monitorim nga Autoriteti i Konkurrencës dhe në rast se vërehen luhatje të çmimeve që tejkalojnë masën e ndryshimeve të çmimeve në bursat ndërkombëtare, do të ndërmeren masa penalizuese.
Luhatjet në çmimin e naftës ne vend vijnë pas shtrenjtimit të naftës në tregjet ndërkombëtare ku aktualisht një fuci naftë po tregtohet me mbi 80 dollarë.
