Partia Demokratike ka reaguar pas publikimit të videos së kryebashkiakut të Bulqizës Lefter Alla.
Pak momente më parë gazetari Artan Hoxha publikoi videon ekskluzive në Abc Neës të kryebashkiakut, duke konsumuar lëndë narkotike në një lokal.
Ndërkaq, selia blu me anë të një deklarate zyrtare e quan videon shokuese , teksa e cilëson kryebashkiakun si “Edi Rama i Bulqizës”.
Demokratët kërkojnë shkarkimin e menjëhershëm të Allës, ndërsa sipas PD Rama ka përgjegjësinë politike për përzgjedhjen e këtyre individëve.
Deklarata e plotë e Partisë Demokratike:
Kandidimi në 30 Qershor nga Edi Rama i individëve me të shkuar kriminale apo personave të lidhur me krimin e organizuar ka qenë strategji e Edi Ramës për të vazhduar bashkëqeverisjen me krimin.
Video shokuese e kryebashkiakut ilegjitim të emëruar nga Edi Rama në Bulqizë, është modeli që ofron ai në qeverisje. Lefter Alla është pasqyra ku të gjithë mund të shohin Edi Ramën e kokainës.
Ai ka jo vetëm përgjegjësinë politike për përzgjedhjen e këtyre individëve, por edhe përgjegjësinë ligjore për shkarkimin e menjëherëshëm nga detyra të Lefter Allës.
Edi Rama i Bulqizës duhet të ndiqet penalisht për moskallëzim krimi ndaj atyre që i kanë siguruar kokainën.
Përdorimi i kokainës në ambiente publike nga Edi Rama i Bulqizës provon, për fat të keq, degradimin e Partisë Socialiste nga një parti politike në një bandë trafikantësh dhe përdoruesish droge. Është kjo arsyeja pse të rinjtë e mirëshkolluar dhe shqiptarët e ndershëm kanë humbur besimin dhe kërkojnë të largohen nga Shqipëria.
Ndarja e politikës nga krimi është emergjencë kombëtare!
Largimi i trafikantëve dhe përdoruesve të drogës nga politika është hapi kyç për t’i hapur rrugë një qeverisje normale në Shqipëri dhe për të kthyer besimin tek të rinjtë se meritokracia dhe jo lidhja me krimin janë mundësia për të bërë karrierë.
Kjo ndodh vetëm me largimin e Edi Ramës, njeriut të kokainës që promovoi bashkëqeverisjen me krimin dhe qëndron në pushtet me mbështetjen e krimit.
/abcnews.al
