Një sulm ajror izraelit në një kamp ku strehohen personat e zhvendosur në jug të Gazës la të vrarë të paktën 21 persona, tha drejtori i spitalit Nasser, Atif al-Hout, në qytetin e Han Junisit.
Nga sulmi kanë mbetur të plagosur edhe 28 persona.
Ushtria izraelite tha se një avion tij ushtarak goditi zyrtarë të lartë të Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – që “ishin të përfshirë në aktivitete terroriste” në atë zonë.
Trupat e të paktën 15 viktimave janë dërguar në spitalin Nasser, por autoritetet shëndetësore thanë se do të jetë e vështirë të dihet numri i saktë i viktimave, pasi shumica e trupave të tyre janë gjymtuar dhe kanë pësuar djegie të rënda.
Sulmi ajror goditi zonën e Muvasit, ku gjendet një kamp që strehon qindra mijëra persona të zhvendosur. Në sulmet e kryera më herët gjatë ditës në Gazë lanë të vrarë tetë persona, përfshirë katër fëmijë, thanë zyrtarët shëndetësorë.
