Cristiano Ronaldo është golashënuesi më i mirë i historisë së futbollit. Trigolëshi i sotëm ndaj Cagliarit e ka ngjitur yllin e Juventusit në shifrën e 770 golave në ndeshjet zyrtare, duke parakaluar legjendën Pele (767 gola).
Braziliani i famshëm nuk ka vonuar të urojë 36-vjeçarin portugez me anë të një postimi në rrjetet sociale. “Cristiano, jeta është një fluturim i vetëm, çdokush bën rrugëtimin e tij. Të admiroj shumë, më pëlqen të të shoh duke luajtur, nuk është sekret një gjë e tillë.
Urime që mposhte rekordin tim të golave në ndeshje zyrtare. Keqardhja ime e vetme është që nuk jam në gjendje t’iu përqafoj sonte. Po postoj këtë foto për ty, me shumë dashuri, si simbol i një miqësie që ekziston prej vitesh“, shkruan Pele.
Ndërkohë nuk mungon përgjigja e CR7. “Fjalët e para shkojnë për Pele: nuk ka futbollist që nuk është rritur me historitë e golave, arritjeve dhe fitoreve të Pele, unë nuk bëj përjashtim. Ky është shkaku pse jam i mbushur me gëzim dhe krenari. S’e kisha ëndërruar kurrë që do e thyeja këtë rekord“. /abcnews.al
