Kryefjalë në Pressing, është emri i Ernest Muçit. Sulmuesi i talentuar i Tiranës mund të largohet nga bardheblutë këtë sezon, me ekipe nga Kroacia dhe Belgjika që e duan. Hoxhallari, Starova, Cenolli dhe Riza folën për talentin e Tiranës.
Erion Hoxhallari – “Trajneri besoj se nuk mund të rrezikojë aq shumë në kampionat, sepse i kërkohet me patjetër rezultati pozitiv dhe nuk mund të bëjë shumë ndryshime. Rezultatet i kanë dhënë të drejtë që ka besuar te vetëm një formacion. Te Tirana, kanë luajtur të gjithë. Kush më pak, kush më shumë, i kanë marrë minutat. Muçi ka shumë pak kohë që është rikuperuar”.
Sulejman Starova – “Muçi po përmendet si super-talent dhe fakti që nuk është aktivizuar, ka qenë i dëmtuar. Do ishte mirë me Ngoo në sulm, pasi Ngoo bën mirë lojën në ajër”.
Mario Cenolli – “Ngoo është asistuesi më i mirë në Superligën shqiptare me 15 asiste. Unë do të kisha pasur dëshirë të shikoja Muçin duke luajtur me Michael, për ta parë sa vlen si lojtar. Është i talentuar, ndoshta do kisha dëshirë ta shikoja me një 4-4-2, me Ngoo përpara dhe Muçin mbrapa”.
Florian Riza – “Ky nuk është një talent i shpallur në ditët e fundit, ka që në 2018-ën, është aktivizuar në Shkodër kundër Kukësit mos gaboj. Është një lojtar i spikatur. Ka një minutazh të pakët. Nuk e di si ndodh kjo gjë, nuk e di si e ka kontratën”./abcnews.al
