Ministri i Jashtëm i Tajvanit, Joseph Wu, njoftoi të premten një ndihmë prej 8 milionë dollarësh për kryeqytetin ukrainas, Kievin, gjatë një video-bisede me kryetarin e bashkisë së Kievit, Vitali Klitschko.
Sipas deklaratës, donacioni përfshin 3 milion dollarë për qeverinë e Kievit dhe 5 milion dollarë shtesë për gjashtë spitalet lokale. Kjo është hera e katërt që Tajvani dërgon donacione në vendin e shkatërruar nga lufta.
Gjatë video-telefonatës, Wu tha se pushtimi i Rusisë në Ukrainë, jo vetëm që shkaktoi dëm të madh për poppullin ukrainas, por gjithashtu kërcënoi rendet ndërkombëtare dhe komunitetin demokratik.
Ai shtoi se Tajvani dhe Ukraina janë partnerë që ndajnë ideologjinë demokratike dhe janë në ballë për të penguar zgjerimin e totalitarizmit.
Klitschko falenderoi Wu për donacionin nga qeveria dhe populli tajvanez, duke thënë se “paqja mund të fillojë vetëm kur ushtari i fundit rus të largohet nga Ukraina.”
Ai gjithashtu i kërkoi komunitetit ndërkombëtarë të dënojë dhe sanksionojë Rusinë./abcnews.al/
