Një gjykatë në Bruksel ka shpallur fajtorë gjashtë burra për vrasje terroriste, shtatë vite pas sulmeve me bombë që vranë 32 persona në aeroportin e qytetit dhe një stacion metroje në mars 2016.
Pas një gjyqi të gjatë dhe 19 ditësh diskutime të jurisë, gjykata në Bruksel bëri të ditur vendimet e tyre.
Disa nga ata në gjyq ishin dënuar tashmë për pjesëmarrje në sulmet terroriste të Parisit muaj më parë.
Salah Abdeslam u arrestua disa ditë para shpërthimeve të Brukselit.
Ai u shpall fajtor në Francë vitin e kaluar për sulmet me bomba dhe me armë në Paris në 2015, në të cilat 130 persona humbën jetën. Gjyqi belg, i cili filloi dhjetorin e kaluar, tani e ka dënuar atë për vrasje dhe tentativë vrasje edhe në Bruksel.
Një tjetër nga ata që tani janë shpallur fajtorë për të dy shpërthimet, Mohamed Abrini, u identifikua në CCTV duke ikur nga aeroporti Zaventem kur eksplozivi i tij nuk shpërtheu.
Ai u bë i njohur si “burri me kapelë” dhe ishte në mesin e një numri të dyshuarish të arrestuar në Bruksel disa javë pas sulmit.
Sulmet në Bruksel ndodhën brenda një ore nga njëra-tjetra më 22 mars 2016.
Dy bomba shpërthyen pak para orës 08:00 në skajet e kundërta të sallës së nisjeve në aeroportin Zaventem, duke lënë të vdekur 16 persona.
Një orë më pas, një shpërthim tjetër ndodhi në një tren në stacionin e metrosë Maelbeek në lagjen evropiane të Brukselit, afër institucioneve të BE-së. 16 persona të tjerë vdiqën në atë bombardim, qindra të tjerë u plagosën.
