Loading ...
Mbi 850 mijë persona kanë mbetur pa energji elektrike në disa rajone të Ukrainës, pas sulmeve masive ruse gjatë natës ndaj infrastrukturës energjetike.
Ndërkohë, presidenti ukrainas Volodymyr Zelensky ka denoncuar një tjetër sulm me dron nga forcat ruse, këtë herë në zonën ku po zhvillohen operacionet e kërkim-shpëtimit në Komyshuvakha.
Kompania ukrainase e energjisë DTEK njoftoi se Rusia kishte ndërmarrë një sulm masiv ndaj sektorit energjetik, duke shënjestruar objekte të rëndësishme në rajonin e Dnipropetrovskut.
Sipas kompanisë, mbi 600 mijë banorë në distriktet Pavlohrad, Samar, Kamianske dhe Dnipro, përfshirë qytetin e Dnipros, mbetën pa energji elektrike. Autoritetet bënë të ditur se furnizimi me energji po rikthehej gradualisht.
Ndërprerje të energjisë u raportuan edhe në rajone të tjera, përfshirë Kharkivin dhe Zhytomyrin. Në këtë të fundit, rreth 140 ndërtesa banimi mbetën pa ngrohje pas një sulmi rus. Ndërsa në Kharkiv, rreth 250 mijë konsumatorë mbetën pa energji elektrike, por furnizimi u rikthye më vonë.
Sulmet ndaj infrastrukturës energjetike janë intensifikuar në prag të dimrit, ndërsa Ukraina përballet me vështirësi në mbrojtjen nga sulmet ajrore për shkak të mungesës së raketave interceptuese.
Presidenti Zelensky deklaroi se vetëm gjatë javës së fundit, Rusia ka lëshuar drejt Ukrainës 115 raketa, afro 1 mijë e 900 bomba ajrore të drejtuara dhe më shumë se 3 mijë dronë sulmues.
