Të paktën pesë raketa janë lëshuar nga qyteti Zummar i Irakut drejt një baze ushtarake amerikane në verilindje të Sirisë, kanë thënë për Reuters dy burime irakiane të sigurisë.
Sulmi kundër forcave amerikane është i pari që nga fillimi i shkurtit, kur grupet e mbështetura nga Irani në Irak ndaluan sulmet e tyre kundër trupave amerikane.
Sulmi vjen një ditë pasi kryeministri irakian Mohammed Shia al-Sudani u kthye nga një vizitë në SHBA dhe u takua me presidentin Joe Biden në Shtëpinë e Bardhë.
Në një postim në Telegram, të lidhur me Kataib Hezbollah, thuhej se fraksionet e armatosura në Irak kishin vendosur të rifillonin sulmet pas një pauze gati tre mujore pasi panë pak përparim në bisedimet për t’i dhënë fund koalicionit ushtarak të udhëhequr nga SHBA në vend.
“Ajo që ndodhi pak më parë është vetëm fillimi,” tha Kataeb Hezbollah.
Një tjetër grup i njohur në Telegram i afërt me Kataib Hezbollah, Sabreen News, tha më vonë se nuk kishte pasur asnjë deklaratë zyrtare nga fraksioni i mbështetur nga Irani.
Një zyrtar amerikan, duke folur në kushte anonimiteti, deklaroi se më shumë se pesë raketa u hodhën nga Iraku drejt trupave në një bazë koalicioni në Rumalyn, Siri, por asnjë personel amerikan nuk u lëndua.
Sulmet erdhën pas një shpërthimi të madh në një bazë ushtarake në Irak herët të shtunën, duke vrarë një anëtar të një force irakiane të sigurisë që përfshin grupe të mbështetura nga Irani. Komandanti i forcës tha se ishte një sulm, ndërsa ushtria u shpreh se ishte duke hetuar dhe nuk kishte avionë luftarakë në qiell në atë kohë./abcnews.al
