Loading ...
Kryeministri spanjoll Pedro Sanchez njoftoi të mërkurën krijimin e një rrjeti mbarëkombëtar të “strehëzave klimatike” për të mbrojtur popullsinë nga valët e të nxehtit, ndërsa vendi përballet me temperatura gjithnjë e më të larta.
Në vitet e fundit, Spanja ka përjetuar valë më të gjata të të nxehtit në verë dhe shira të rrëmbyeshëm në vjeshtë, fenomene që i atribuohen efektit serë të shkaktuar nga aktiviteti njerëzor. “Disa vera, nuk po flasim më për valë të të nxehtit, por për një valë të përhershme “, tha Sanchez në një konferencë shtypi në Madrid, duke përshkruar një “realitet të ri” të “thatësirave katastrofike” më të shpeshta dhe intensive.
“Prandaj, para verës së ardhshme, ne do të përurojmë një rrjet kombëtar të strehimoreve klimatike”, njoftoi ai, duke thënë se kryesisht dëshiron t’u “vërë në dispozicion ndërtesat publike” spanjollëve. Ne gjithashtu do të lehtësojmë financimin për krijimin e strehimoreve të tilla në lagjet më të cenueshme, ku nxehtësia është më intensive”, shtoi ai, megjithatë pa paraqitur ndonjë shifër. Kryeministri socialist tha se qeveria qendrore synon të koordinojë veprimet e saj me autoritetet e rajoneve që kanë krijuar tashmë “streha klimatike”, siç është rasti në Vendin Bask dhe Katalonjë.
Në Spanjë, për shkak të sistemit të decentralizuar të qeverisjes, rajonet janë përgjegjëse për menaxhimin e emergjencave, duke përfshirë emergjencat klimatike. Barcelona, kryeqyteti i Katalonjës, është një nga qytetet e pakta të mëdha që tashmë ka strehimore klimatike, shumica e tyre në biblioteka, shkolla dhe ndërtesa të tjera publike me ajër të kondicionuar.
Vera e vitit 2025 ishte një nga më të nxehtat e regjistruara ndonjëherë në Spanjë, me termometrin që shënoi një mesatare prej 24.2°C, sipas agjencisë kombëtare meteorologjike Aemet. Nga 16 maji deri më 30 shtator, 3,832 vdekje mund t’i atribuohen nxehtësisë, sipas Ministrisë së Shëndetësisë. / abcnews.al /
