Nisur nga skandali i fundit në Berat që shkaktoi një reagim të fortë, ministrja e Arsimit Evis Kushi ka firmosur një urdhër që ndalon aplikimin dhe konkurrimin për të punuar si mësues të personave të dënuar për kryerjen e një vepre penale kundrejt të miturve.
“Duke marrë shkas nga rasti i fundit i punësimit në Berat të një mësuesi që shkaktoi zemërim të lartë publik, sot firmosa menjëherë ndryshimin e udhëzimit që ndalon aplikimin dhe konkurrimin për të punuar si mësues të personave të dënuar, për të cilët gjykata ka marrë vendim të formës së prerë, për kryerjen e një vepre penale kundrejt të miturve apo për kryerjen e një vepre penale që lidhet me institucionet arsimore.
Ky vendim shmang rrezikun që mund t’i vijë nxënësve tanë nga persona që nuk garantojnë integritet të lartë moral dhe ligjor. Angazhohemi që të vijojmë me një punë akoma më intensive për të ndërmarrë iniciativa të tjera ligjore që garantojnë më shumë mbrojtjen dhe mirëqenien e fëmijëve tanë” shkruan ministrja.
Por cfarë ndodhi në Berat?
Pak ditë më parë në Berat nxënës dhe prindër denoncuan se një mësues i dënuar për pedofili dhe ngacmim seksual u rikthye për të dhënë mësim në shkollën 9-vjeçare “22 Tetori”. Pas denoncimit të rastit reaguan institucionet duke e pezulluar (lexo këtu historinë e plotë)./ Abcnews.al
