Katër ministra japonezë dhanë dorëheqjen sot, ndërsa Fumio Kishida njoftoi të mërkurën se do të merrte masa në lidhje me një rast mashtrimi financiar në partinë e tij.
Ministri i Ekonomisë, Tregtisë dhe Industrisë Yasutoshi Nishimura, Ministri i Brendshëm Junji Suzuki dhe Ministri i Bujqësisë Ichiro Miyashita dhanë dorëheqjen mëngjesin e sotëm, sipas raporteve të shtypit japonez.
“I kam dorëzuar dorëheqjen kryeministrit”, tha Hirokazu Matsuno krahu i djathtë i kryeministrit, sekretar i përgjithshëm i qeverisë dhe deri më sot zëdhënës i qeverisë, pasi edhe ai është i përfshirë në këtë çështje.
Sipas shtypit japonez, prokurorët po hetojnë për mashtrim financiar disa anëtarë dhe drejtues të Partisë Liberal Demokratike, e cila drejtohet nga Kishida.
Partia është në pushtet që nga viti 1955.
Dyshohet, sipas disa raporteve, se miliona euro të siguruara nga shitja e biletave për ngjarjet e mbledhjes së fondeve nuk janë deklaruar dhe se paratë i kanë marrë anëtarët dhe drejtuesit.
Rreth 500 milionë jen (3.2 milionë euro) thuhet se kanë marrë anëtarët e partisë gjatë një periudhe pesëvjeçare deri në vitin 2022.
Kishida, i cili mori detyrën në vjeshtën e vitit 2021 dhe tashmë kishte një popullaritet shumë të ulët përpara se lajmet për skandalin e ri të mbushnin rrjetet sociale, tani mbështetet nga vetëm 23% e votuesve, sipas një sondazhi.
/abcnews.al
