Autobusi i fundit që transportonte armenë nga Nagorno-Karabakh u largua nga rajoni të hënën, duke përfunduar një eksod masiv të më shumë se 100,000 njerëzve, më shumë se 80% e popullsisë së tij.
Sipas Associated Press, autobusi që hyri në Armeni mbante 15 pasagjerë me sëmundje të rënda dhe probleme lëvizëse, tha Kayam Stepanian, zëdhënësi i të drejtave të njeriut në Nagorno-Karabakh.
Brenda 24 orëve, Azerbajxhani arriti të merrte kontrollin e rajonit pas një ndërhyrjeje ushtarake që filloi dhe detyroi forcat separatiste të Nagorno-Karabakut të kapitullonin.
Ndërsa Baku është zotuar të respektojë të drejtat e armenëve në Nagorno-Karabakh, shumica u larguan menjëherë nga rajoni, nga frika e hakmarrjeve ose kufizimeve në gjuhën, fenë dhe zakonet e tyre.
Qeveria armene tha të hënën se 100,514 nga rreth 120,000 banorë të rajonit kanë shkuar në Armeni.
Ministri i shëndetësisë i Armenisë, Anahit Avanesyan, tha se disa vdiqën gjatë udhëtimit rraskapitës dhe të ngadaltë përmes korridorit malor për në Armeni që zgjati deri në 40 orë. Ajo u parapri nga një bllokadë nëntë-mujore e rajonit nga Azerbajxhani që la shumë njerëz që vuanin nga kequshqyerja dhe mungesa e ilaçeve.
Sergey Astsetryan, 40 vjeç, një nga banorët e fundit të Nagorno-Karabakut që u largua nga rajoni me automjetin e tij të dielën, tha se disa të moshuar kanë vendosur të qëndrojnë, duke shtuar se të tjerët mund të kthehen nëse shohin se është e sigurt për armenët të jetojnë nën sundimi i Azerbajxhanit.
