Avokati i Emiliano Shullazit, Vladimir Meçi i është drejtuar me një letër kryeministrit Edi Rama, kryetarit të Kuvendit Gramoz Ruçi dhe Presidentit të republikës Ilir Meta duke kërkuar intepretimin e ligjit që parashikon izolimin e të burgosurve nën regjimin e quajtur si “41-BIS”.
Përmes letrës dërguar krerëve të shtetit, Meçi shprehet se ligji është miratuar me shpejtësi dhe mbart mjaft probleme.
Nisur nga këto gabime, avokati shprehet se Shullazi mbahet padrejtësisht i izoluar.
“Urdhri i Ministrit të Drejtësisë, si në firmë edhe në përmbajtje kundra ligjshëm dhe abuziv dhe ne e kemi kundërshtuar tashmë gjyqërisht për këto kundraligjshmëri.
Ligji 108/2018 i miratuar me urgjencë, në vigjilje të ndërrimit të viteve, paraqet një sërë problemesh” shton më tej avokati Meçi.
Po ashtu ai kërkon rishikim të aplikimit të ligjit:
“Nuk është asnjëherë e vonuar apo e tepërt të pranohet që ekzistojnë mangësi në një proces të hartimit e zbatimit të ligjit, apo që nuk janë marrë në konsideratë Aktet e marrëveshjet ndërkombëtare. Aq më tepër nuk është e vonuar apo e tepërt të rishikohet një gjendje e caktuar ligjore apo edhe e mënyrës së aplikimit të ligjit, kur kjo është në funksion të humanizmit, drejtësisë, barazisë para ligjit dhe distancimit nga politika që shpien në trajtime çnjerëzore, degraduese e me tipare të torturës”, thuhet në letër. /abcnews.al
