Kombet e Bashkuara kanë përfunduar me sukses transportin e 1 milion barelave të naftës nga një tanker i vjetruar në një më të ri me qëllim që të shmanget katastrofa ekologjike në Jemenin e përfshirë në luftë civile.
Kombet e Bashkuara kanë deklaruar se me transportin e naftës në anijen e re është shmangur katastrofa që ka mundur të shkatërronte biodiversitetin dhe botën ujore për më shumë se 50 vjet.
Organizatat ndërkombëtare dhe grupet për të drejtat e njeriut për vite të tëra kishin paralajmëruar për rrjedhjen e mundshme ose shpërthimin e tankerit, i cili nuk është mirëmbajtur.
Procesi i transportit të naftës është kryer gjashtë kilometra larg brigjeve në Detin e Kuq që kontrollohen nga rebelët huthi të përkrahur nga Irani. Ata janë në luftë me qeverinë e njohur nga shtetet e tjera.
