Shtohen “hallet” te skuadra e Milan. Stefano Pioli merr një lajm aspak pozitiv përpara ndeshjes me Chelsea në Champions League, takim që do të luhet ditën e mërkurë duke nisur që nga ora 21:00.
Infermieria e kuqezinjve është mbushur plot, pasi përveç Mike Maignan, Theo Hernandez, Junior Messias, Alessandro Florenzi, Divock Origi e Zlatan Ibrahimovic, që po vazhdojnë të mungojnë shkaku i dëmtimeve, kësaj liste i janë shtuar edhe dy lojtarë të tjerë.
Bëhet fjalë për Davide Calabria dhe Alexis Saelemaekers, të cilët u larguan të dëmtuar në ndeshjen me Empolin, takim që kuqezinjtë e fituan me shifrat 3-1.
Në këtë mënyrë Pioli duhet të bëjë llogaritë pa dyshen e lartpërmendur për përballjen me Chelsea, duke shtuar kështu “dhimbjet e kokës” për teknikun, i cili duhet të “arnojë” tashmë formacionin. /f.a/abcnews.al
