Presidenti i Venezuelës, Nikolas Maduro pretendon se ka shmangur një grusht shteti të organizuar nga Shtetet e Bashkuara. Ndërkohë, vendi latin vijon të përballet me mungesë të energjisë elektrike, për shkak të së cilës thuhet se kanë humbur jetën 13 persona.
Presidenti i Venezuelës, Nikolas Maduro ka vlerësuar forcat e armatosura që i kanë qëndruar besnike për shmangien e një grushti shteti të udhëhequr nga Shtetet e Bashkuara dhe lideri i opozitës Huan Guaido. Gjatë një mitingu, Maduro fajësoi gjithashtu opozitën për ndërprerjen e energjisë elektrike, për shkak të së cilës kanë humbur jetën 13 pacientë të një spitali.
Deklarata e presidentit, që e lidhi gjithashtu ndërprerjen e energjisë me sulme kibernetike, erdhi në një ditë kur në vend po mbaheshin protesta si nga mbështetësit ashtu edhe nga kundërshtarët e tij. Maduro ka ruajtur mbështetjen e forcave të armatosura dhe Rusisë me Kinën që kur Guaido u vetëshpall president i përkohshëm i vendit më 23 Janar.
Duke folur jashtë pallatit presidencial Miraflores, Maduro e cilësoi Guaidon një “klloun dhe një marionetë” të Shteteve të Bashkuara.
“Ata u bënë thirrje forcave të armatosura të kryenin një grusht ushtarak shteti dhe përgjigjia e tyre ishte e qartë; ata i mposhtën komplotuesit”, deklaroi Maduro.
Ndërkohë, në protestat kundër kreut të shtetit, disa manifestues sulmuan policinë duke klithur “vrasës” dhe disa oficerë u përgjigjën duke qëlluar spraj djegës ndaj tyre./abcnews.al
