Ministrja e Arsimit Besa Shahini, bashkë me përfaqësuesin e UNICEF Albania, Roberto de Bernardi, ka prezantuar masat anti-Covid në shkolla me nisjen e vitit të ri shkollor 2020-2021.
Shahini këshilloi fëmijët të jenë të vëmendshëm me mësimet e prapambetura por edhe me masat anti-covid për të mbrojtur veten dhe të tjerët.
Ajo deklaroi se në çdo kat do të ketë një mësues kujdestar që do të monitorojë lëvizjet e nxënësve për të shmangur grumbullimet e tyre.
“Ne kemi vendosur që për këtë fillim të vitit shkollor të hapim shkollat sepse e kemi parë të rëndësishme që nxënësit të kthehen në ambientet shkollore duke ruajtur shëndetin e tyre. Është organizuar hyrja me distancë, matje të temperaturës në hyrje dhe dalje.
Është e rëndësishme që ata të mbajnë distancën edhe në kohën kur janë në shkollë. Në çdo kat do ketë mësues kujdestar që do ndihmojë nxënësit të lëvizin për të evituar grumbullimin e tyre duke ruajtur distancën. Duhet të ruajmë shëndetin tonë, maskat duhet t’i mbani gjithë kohës”, u shpreh Shahini.
Roberto de Bernardia përsëriti tre sjelljet kryesore për mbrojtjen nga koronavirusi, duke e cilësuar hapjen e shkollave një hap të rëndësishëm për vendin dhe fëmijët.
“Falenderoj Shahinin që organizon këtë aktivitet. Të gjithë e dimë që këto janë kohë të vështira prandaj ju po i zbaton këto masa. Rikthimi në shkollë është i rëndësishëm. E përsëris kur jeni ulur në bankë mbani distancën, përdorni dezinfektues dhe vendosni maskën.
Hapja e shkollave është diçka e rëndësishme për vendin dhe fëmijët. UNICEF ka bashkëpunuar për të siguruar xhelët, posterat sensibilzues. Kemi siguruar edhe një pajisje digjitale për mësimin online dhe njëkohësisht kemi mbështetur me prodhimin e kurseve online, kurrikula etj”, tha ai.
Mësimi në shkolla do të nisë në datë 14 shtator dhe do të zhvillohet me tre turne, ndërsa në klasa nuk do të lejohen më shumë se 20 fëmijë./m.v. abcnews.al
