Sulmuesi i Juventusit, Alvaro Morata, është rikthyer të flasë për aventurën e tij tek bardhezinjtë. Në një intervistë për “El Larguero”, spanjolli ndalet tek ecuaria e “Zonjës së Vjetër” këtë sezon si dhe prek pak temën e së ardhmes së tij. Në fund ai pyetet edhe për lajmet mbi Cristiano Ronaldon, por Morata nuk tregon pothuajse asgjë.
SEZONI ME JUVENTUSIN – “Po kalojmë një vit të komplikuar, disa detaje të vogla na lanë jashtë Champions League. Gabimet kanë të njëjtën vlerë, penalltia nuk u dha… ndoshta është faji i të gjithëve. Nëse unë do të kisha shënuar me kokë, tashmë do të ishim në çerekfinale. Gjithsesi, duhet të shikojmë anën pozitive pasi jemi në finale të Kupës së Italisë, fituam Superkupën si dhe jemi ende në garë për titullin kampion.
E ARDHMJA – “Duhet ta pranoj se kur huazohesh në shumë klube, mendimi juaj ka pak rëndësi. Unë isha i lumtur tek Atletico dhe këtu jam po aq i lumtur. Kam një kontratë deri në fund të sezonit e më pas drejtuesit do të më tregojnë se çfarë do të ndodhë. Tani për tani nuk kam biseduar me klubin për këtë çështje. Te Juventusi po fillon një projket i ri dhe për këtë gjë jam i lumtur.
CRISTIANO RONALDO – “Ne flasim për gjithçka me CR7, por jo për futbollin. Jemi së bashku në fushë duke biseduar për taktika, por jashtë saj flasim për aktualitetin, ngjarjet në botë e kështu. Ai është i lumtur me grupin, por është mësuar të fitojë. Unë dua që Ronaldo të qëndrojë, pasi kështu do të kemi në ekip lojtarin më të mirë të botës. Kritikat? Të gjithë kritikohemi dhe askush nga ne nuk bezdiset nga ato. E përsëris se me fitoren e Kupës nuk do të jetë aspak një sezon i keq për ne”, përfundon Morata. /abcnews.al
