Ishte padyshim një fitore e nevojshme, pas dy humbjeve radhazi.
“Djajtë” e Milan janë rikthyer sërish te tre pikët, teksa pasditen e kësaj të shtune kanë mundur në “San Siro”, me rezultatin minimal, 1-0, “Bardhezinjtë” e Udinese, në përballjen e vlefshme për javën e tetë të Serie A.
Goli i vetëm i sfidës erdhi në minutën e 13’-të, nga “fantazisti” nigerian, Samuel Chukwueze, ndërsa që nga minuta e 29’-të, Milan luajti me 10 lojtarë pas daljes me kartonin e kuq të holandezit të mesfushës, Tijjani Reijnders.
Megjithatë duhet thënë se ndikim të madh në këtë sfidë pati edhe sistemi VAR, me dy gola të anulluar të lojtarëve të Udinese, fillimisht atë të Ehizibue, në fundin e pjesës së parë e më pas golin e belgut Christian Kabasele, në sekondat e fundit të lojës.
Falë këtij rezultati Milan ngjitet në vendin e tretë të Serie A, me 14 pikë, po aq sa Inter i vendit të dytë dhe vetëm 2 pikë më pak se Napoli kryesuese, ndërsa Udinese ndodhet në vendin e 6-të me 13 pikë. /i.m /abcnews.al
