Paolo Maldini është rikthyer të flasë për ecurinë e Milanit, vendin e parë në renditje dhe Zlatan Ibrahimovic. Në një prononcim për Radio 105, drejtori sportiv i kuqezinjve e nis me një koment për Milanellon, qendrën stërvitore të klubit të famshëm italian.
“Milanello është një vend i veçantë për mua, edhe tani që mbaj postin e drejtuesit. Ka qenë skena e shumë ngjarjeve të vogla, që kanë ndikuar të bëhej e madhe skuadra jonë. Nuk ka pësuar shumë ndryshime, por po tentojmë ta bëjmë disi më moderne.
Sekreti i ecurisë së Milanit? Nuk e zbulojmë, por gjithçka vjen nga puna e madhe, koncepti i lojës, idetë e drejtuesve në lidhje me lojtarët e rinj dhe krijimin e një ekip të qëndrueshëm ekonomik, por edhe mundësia e vetëfinancimit, edhe pse jemi vetëm në fillimet tona në këtë aspekt.
Të gjitha këto bashkë ndikojnë në krijimin e një Milani kompetitiv dhe që dhuron spektakël për tifozët e shumtë. Flitet që ndodhemi në vend të parë edhe nga fakti që ndeshjet po luhen pa tifozë, por, të them të drejtën, ata do të na jepnin më shumë forcë me mbështetjen e tyre.
Është një gjë e keqe të luash pa praninë e tyre. Ibrahimovic? Jam përballur me të kur luante me Ajax, Juventusin dhe Interin. Luaja në qendër të mbrojtjes dhe e markoja në goditjet e këndit. Me kalimin e kohës është bërë më i madh sesa ka qenë.
Roli i drejtuesit? Sigurisht që unë kam një histori dhe njerëzit më respektojnë, por dua duhet të fitoj respekt të ri në postin që mbaj. Më mungojnë ndeshjet, por sërish përfshihem në gëzimet dhe vuajtjet e Milanit. Nuk kam pasur frikë se mos shkatërroj atë emër të mirë që kam vendosur, më dukej absurde të mos e provoja rolin e drejtuesit“, deklaron Paolo Maldini. /abcnews.al
